சிகாகோ: அமெரிக்காவிற்கும் ஆசியவிற்கும் இடையே பசிபிக் பெருங்கடலின் மையத்தில் அமைந்துள்ள ஹவாய் தீவில் 1941ஆம் ஆண்டு டிசம்பர் 7ஆம் தேதி ஒரு பெரும் வரலாற்று சம்பவம் நிகழ்ந்தது. இந்த தீவில் உள்ள பேர்ல் ஹார்பர் 2 மணி நேரத்திற்குள் குண்டுகளாலும், மரண ஓலங்களாலும் நிறைந்தது. ஜப்பானிய போர் விமானங்களின் திடீர் தாக்குதலில், அமெரிக்க கடற்படையின் 5 போர்க்கப்பல்கள் மூழ்கடிக்கப்பட்டன. 16 கப்பல்கள் சேதமடைந்தன. 188 விமானங்கள் அழிக்கப்பட்டன. அமெரிக்க ராணுவ வீரர்கள், மாலுமிகள், பொதுமக்கள் உள்பட 2,400 பேர் கொல்லப்பட்டனர்.
இந்த சம்பவத்தின்போது மூழ்கடிக்கப்பட்ட கப்பல்கள் 2 ஆண்டுகளுக்கு பின் வெளியே எடுக்கப்பட்டன. அதில் 300-க்கும் மேற்பட்ட ராணுவ வீரர்கள் மற்றும் மாலுமிகளின் எச்சங்கள் கிடைத்தன. அவற்றில் பெரும்பாலானவை அடையாளம் காண முடியாத நிலையில் இருந்தால் அனைத்தும் ஓக்லஹோமாவில் உள்ள கல்லறையில் புதைக்கப்பட்டன. அதன்பின் 2003ஆம் ஆண்டு பல் பதிவுகளை வைத்து அடையாளம் காண மீண்டும் எச்சங்கள் தோண்டி எடுக்கப்பட்டன. அப்போது பலரது அடையாளங்கள் காணப்பட்டு, அவர்களது சந்ததியினரிடம் ஒப்படைக்கப்பட்டன. இருப்பினும் 100 செட் பல் பதிவுகள் அப்போதைய தொழில்நுட்பத்தை வைத்து அடையாளம் காணமுடியாத நிலையில் இருந்தன. அதன்பின் 2015ஆம் ஆண்டு அந்த பல் பதிவுகள் மீண்டும் ஆய்வுக்கு உட்படுத்தப்படும் என்று அமெரிக்க பாதுகாப்புத் துறை அறிவித்தது. இந்த ஒவ்வொரு ஆய்வின்போதும் பேர்ல் ஹார்பரில் தங்களது முன்னோர்களை பறிகொடுத்த சந்ததியினர் அவர்களின் எச்சங்களுக்காகவும், இறுதி மரியாதை செய்வதற்காகவும் காத்திருந்தனர்.
இறுதியாக 2019ஆம் ஆண்டில் ஹெர்பர்ட் பெர்ட் ஜேக்கப்சன் என்னும் கடற்படை மாலுமியின் எச்சங்கள் அடையாளம் காணப்பட்டன. அதன்பின் அவரது குடும்பத்திற்கு தகவல் கொடுக்கப்பட்டது. அந்த நேரத்திலேயே கோவிட்-19 காரணமாக ஊரடங்கு அறிவிக்கப்பட்டது. அதன் காரணமாக ஹெர்பர்ட் பெர்ட் ஜேக்கப்சன் இறுதி மரியாதை நிகழ்வு ஒத்திவைக்கப்பட்டது. அதைத்தொடர்ந்து நாளை (செப். 13) ஆர்லிங்டன் தேசிய கல்லறையில் ஹெர்பர்ட் பெர்ட் ஜேக்கப்சனின் எச்சங்கள் ராணுவ மரியாதையுடன் அடக்கம் செய்யப்படும் என்று அமெரிக்க கடற்படை தெரிவித்துள்ளது.
இதுகுறித்து ஜேக்கப்சனின் பேரன் மெக்டொனால்ட் கூறுகையில், "எனது பாட்டி நார்மா ஜேக்கப்சன் 20 வயதிலேயே விதவையாகிவிட்டார். இப்போது அவர் உயிருடன் இல்லை. ஒவ்வொரு டிசம்பர் 7ஆம் தேதியும் தாத்தா ஜேக்கப்சனின் கதையை எங்களிடம் சொல்லி அழுதது நினைவிருக்கிறது. அவரை எப்போதும் நினைவில் வைத்துகொள்ள வேண்டும் என்று சொல்வார். இப்போது எனது தாத்தாவை அடக்கம் செய்யும் வாய்ப்பு எனக்கு கிடைத்ததில் மகிழ்ச்சி என்று தெரிவித்தார்.
இதையும் படிங்க: சீனாவில் நிலநடுக்கத்தால் உயிரிழந்தவர்கள் எண்ணிக்கை 93 ஆக உயர்வு
